Karan Joxar Omar Qureyshi TNN kanaliga bergan intervyusida o‘zining “My name is
Khan” (“Mening ismim Xon”) filmi premerasi ko‘chirilgani, Kajol bilan
muammolari, Bachchanlar, Shohruh Xon va Salmonning iddaosiga munosabatini
bildirdi.
— “My name is Khan”ning ish jadvali
ancha kechikib qolgani siz uchun kutilmagan hol bo‘ldimi?
— Bilasizmi, bo‘lgan voqealar bizning
nazoratimizdan tashqari kechdi. Shuning uchun endi film premerasi keyingi
yilning boshida bo‘ladi. Biz ishni vaqtida qilishga qodir bo‘lmadik. Biz premera
dekabrda bo‘lishiga harakat qilgandik, lekin filmni tugallash uchun hali ancha
ish bor. Shoshilish saviya bobida ma’lum nuqsonlarga sabab bo‘lishi mumkinligini
his qilyapman. Shuning uchun Shohruh ikkimiz premerani keyingi yilga qoldirishga
qaror qildik.
— Mish-mishlarga qaraganda, Kajol siz
bilan ishlamoqchi ham, filmingizda suratga tushmoqchi ham bo‘lmagan ekan...
— Kajol ham, men ham bu kabi bo‘lmag‘ur
gaplardan maza qilib kuldik. Dekabrda Los-Anjelesda suratga olish ishlari
boshlanganda, Tanu xola (Kajolning onasi) stsenariyga ayrim o‘zgarishlar
kiritgani, Kajol bilan mening oram juda sovuqligi haqidagi gaplarni o‘qib
qoldik. Bu shu darajada kulgiliki, javob berishga hojat ham yo‘q.
— “My name is Khan” — Shohruh Xon bilan
hamprodyuserlikdagi ilk loyihangiz. Bu qanday yuz berdi?
— Bu juda kuchli loyiha, uni birga
ishlash uchun ko‘p narsani o‘zimiz his qildik. Loyiha yakuniga yetib qoldi, shu
bois ishonch bilan aytishim mumkinki, ikkimiz ham bu filmning baxtli egalarimiz.
Keyingi loyihada Shohruh yoki men ishtirok etamizmi-yo‘qmi, bundan qat’i nazar,
filmga mas’ulligimizni tushunamiz. Rostini aytsam, “Dostana” (“Do‘stona”)
Shohruhga qay darajada tegishli bo‘lsa, “Om Shanti Om” (“Om Shanti O
m”) filmi
ham menga o‘shanchalik tegishli.
— Keyingi filmingiz — “Wake Up Sid”
(“O‘rningdan tur, Sid”)ga Konkona bilan Ranbirni tanladingiz. Ko‘pchilik
ularning bir-biriga to‘g‘ri kelmasligini sezyapti...
— Men buni to‘g‘ri kelmaslik, deb
atamagan bo‘lardim. Buni qolipdan tashqari kasting, deyish to‘g‘riroq. Konkona
aktrisa sifatida o‘zini topgan, kinoning ma’lum janriga mos keladi. Ranbir esa
yosh, umidli aktyor, aktyorlarning ma’lum avlodiga mansub. Ularni birga
ko‘rganingizda, o‘rtalarida ko‘zga tashlanadigan ohanrabo borligini payqaysiz.
— Matbuotda “Agneepath” (“Olovli
yo‘llar”) filmining rimeykiga tanlab olgan aktyorlar orasida Abxishekning
yo‘qligi Bachchanlarni qattiq ranjitibdi, degan xabarlar chiqdi.
— “Agneepath”ga hali kasting
o‘tkazilmadi. Bu Karan Malxotra, mening “My name is Khan”dagi yordamchimga
tegishli g‘oya. Rimeykning rejissyori ham u bo‘ladi. Hozircha u stsenariyni
yozyapti. Stsenariy tayyor bo‘lishi bilan aktyorlar guruhi haqida o‘ylay
boshlaymiz. Hozircha taxminiy kelishuvlar bo‘ldi, xolos. Lekin bu xabar qanday
qilib hammaga tarqalganiga hayronman. Hamma filmda u yoki bu aktyorning suratga
tushishi haqida o‘zicha bashorat qila boshlagan.
Salmon yaqinda bergan intervyusida “Jonning “Dostana”dagi sahnasiga hech qachon
rozi bo‘lmasdim”, — deb aytdi. Buni o‘zingizga oldingizmi?
— Hech ham. Har kim o‘z fikrini
bildirishga haqli, fikr — ularning shaxsiy huquqi. Bollivudda kinoyulduzlar va
rejissyorlar mening filmimga fikr bildirishlari mumkin. Bunday fikrni yuragimga
yaqin olmayman.
— Xonlarning urushi sizni xafa
qilyaptimi?
— Sizga bitta narsani aytay: bu
gaplarning aksariyati haqiqat bo‘lishi ham, bo‘lmasligi ham mumkin. O‘ylab
topilayotgan gaplar bularning barini fojialashtirib yuboryapti. Bularni, asosan,
matbuot o‘ylab topib, chop etgan. Bu vaziyatni og‘irlashtiryapti. Chunki
mish-mishlar chop etilmaganda, kamroq zarar keltiradi. Odamlarning yolg‘onni
haqiqat deb qabul qilayotgani meni ham tashvishga solyapti.